Simba , Yanga viwanjani leo ligi kuu Tanzania Bara


Ligi  Kuu Tanzania bara inaendelea leo kwa nyasi za viwanja vitatu kuwaka moto huku vigogo vya soka Simba na Yanga vikishuka dimbani kusaka pointi tatu muhimu.

Mchezo wa Yanga na Ndanda unaopigwa katika dimba la Nangwanda Sijaona unatarajiwa kuwa na upinzani mkali kutokana na kila timu kutaka kutunza rekodi yake ambapo Yanga wanaingia uwanjani kwa lengo moja tu kusaka pointi tatu zitakazowapa faida ya kutetea ubingwa wao wakati Ndanda inatunza heshima ya kutofungwa kwenye uwanja wake wa nyumbani.

Yanga-VS-JKT-Ruvu

Ndanda imepanda daraja msimu wa mwaka 2014/2015, na kusalia kucheza kwa mara ya tatu ligi msimu huu huku rekodi ikionesha kuwa wameshatoka sare ya bila kufungana mara mbili na Yanga, kunyukwa mara moja na kuinyuka Yanga bao 1-0.

Yanga iliyokuwa inakabiliwa na michuano ya Kombe la Shirikisho, inashuka dimbani kucheza mechi ya pili baada ya ile dhidi ya African Lyon iliyoshinda mabao 3-0 ikiwa nafasi ya nane kwenye msimamo wa Ligi Kuu na pointi zake tatu.

Ndanda imeshacheza mechi mbili inashika nafasi ya 15 katika msimamo wa ligi ikiwa imepoteza mechi zote za ugenini. Kwa upande wa Yanga, wachezaji wake waliotemwa kwa madai kuwa walishuka kiwango leo wataivaa timu yao hiyo ya zamani wakiwa Ndanda.

Wachezaji hao ni Kiggi Makasi, Jackson Chove na Salum Telela. Aidha katika mechi ya leo, Yanga itawakosa nyota wake sita kutokana na sababu mbalimbali, hao ni Deogratius Munishi, Geofrey Mwashiuya, Pato Ngonyani, Haruna Niyonzima na Vicent Bosou.

Mechi nyingine leo itakuwa ni kati ya Simba ikiikaribisha Ruvu Shooting kwenye Uwanja wa Uhuru maarufu ‘Shamba la Bibi’ ukiwa ni mchezo wa kwanza kupigwa kwenye uwanja huo baada ya kufungwa kwa zaidi ya mwaka mmoja ukifanyiwa matengenezo.

Simba imejipanga kutembeza kichapo kwa maafande wa Ruvu Shooting, baada ya kulazimishwa sare ya bila kufungana na maafande wa JKT Ruvu katika mechi yake ya pili.

Kocha msaidizi wa wekundu hao Jackson Mayanja alisema  kuwa wamefanya marekebisho kwenye baadhi ya mapungufu yaliyojitokeza katika mechi ilizopita ili kuhakikisha wanafanya vizuri katika mechi zao zijazo.

“Tumejipanga vizuri kwenye mchezo wetu dhidi ya Ruvu tumeyafanyia kazi mapungufu yaliyojitokeza kwenye mechi zetu ili kuhakikisha tunaondoka na pointi zote tatu,” alisema Mayanja. Nayo Azam itakuwa mgeni wa Prisons kwenye uwanja wa Sokoine Mbeya.

Bongosoka imeungana na kampuni maarufu ya kubet ya 1XBet , Jiunge Hapa. Tufuate instagram , facebook na twitter. Pia kutangaza nasi tutumie email , bongosoka@gmail.com